Lomar - لومار

Lomar

ثورة الملابس السعودية

موقعهم الرسمي

Facebook

Twitter

"عندما يخرج العقل عن المألوف .. يخرج الإبداع .. لؤي نسيم صاحب شركة لومار خرج عن نطاق العادات والتقاليد المتعارف عليها في الوطن .. ليخرج لنا بإبداع الثوب .. بدأ بالنقد من المجتمع .. والأن الكل يبحث عن موعد قبل الزحمة :).. بارك الله في أيد عملت وأبدعت"

=============================

الهرجة

يا سيدي الهرجة ومافيها .. إنه دعانا السيد لؤي نسيم للمصنع الجديد حق لومار.. مولازم أقول مين السيد لؤي ولوك لوك .. كل العالم تعرف إنه صاحب شركة (ثوب لومار) اللي عجبني في الموضوع طريقة عرضة للإنجازات حقته في المصنع

  بصراحه حررركة أليمه ... عجبتني..

القصة؟
يا سيدي بكل بساطة تروح تفصل التوب وتاخد المقاس في محل لومار .. لكن هل فكرت كيف يتعمل الثوب دا؟ ما يهمك .. أكيد ...لكن لو تعرف إنه وراء هذا المشروع ما يقارب 300 موظف عشان تتم العملية!!! مو سهل الهرجة ترا.. ماهي شغلة خدني جيتك!!! ... لومار تعمل في منظمة مرتبة وبإحترافية تسمحلها تدخل للعالمية وهذا ما يتمناه صاحب المنشأة (لؤي نسيم) ..

قصة ثوب لومار

وإليكم قصة التوب في المصنع

المستودع

 كمية أقمشة ما شاء الله من خارج الممكلة على حسب البلد يتم تفنيطها

السيد لؤي بيشرح للجمهور ما هوالإسلوب المتبع في المستودع

وإنه بإمكان أي شخص في خلال إسبوعين تدريب .. يفهم مكان كل حاجة

بعد كدا مرحلة غسل القماش

الهدف من غسل القماش عشان يشوفوا مدى جودة القماش ولو في مشكلة من بدري يجنبوه

كمان شفنا في أنواع من القماش ما تتأثر لو أنكبت عليه مويه!!  شوفوا المقطع

 

 حركااااات .. عموما للتنويه هاذي الخاصية تدوم لحد 50 غسلة

وهذا تقرير يوضح إختلاف الثوب من تاريخ المنشأ مع اللون الحقيقي

ستاندرد يا حبيبي شغل نضيف مو حلق... لوز...

بعد كدة تبدأ مرحلة الكوي و التنشيف

دي مكوة!! لحد يفهمني غلط .. جيييدة والله

بعدين يجي اول مرحلة للتدقيق وإختبار الجودة قبل القص

هادي المكينة تشوف درجة جودة القماش بعد الغسيل و الكوي

وهادي الأخطاء إللي يتجنب منها قطعة القماش من جد حاجة ممتازة

وبعد كدة يجي دور مستودع القص و التفنيط على حسب طلب العميل

هنا السيد لؤي بيشرح لنا الموضوع وكل ديزاين ونوعية القماش إللي حتستخدم

وفي الصورة التانية باين إنوا كل حاجة لها كود معين عشان الترميز وكدة

=====

الأن يدخل الطلب لبداية مرحلة (production line)

قبل ما نلوك لوك في الموضوع دا .. حابب أوريكم حاجة مهمة في المصانع

رشاشات الحريق شغالة

فوق ال80 شخص وما شاء الله المكيف مية مية

وكمان لو تلاحظ الكرسي من النوع الفاخر مو أبو كلب

وهذا دليل على سلامة و صحة الموظف في المقام الاول

(شوزولار)

هنا يتم التفصيل و قص القطعة على حسب القياس إللي أتعمل في الفرع

السيد لؤي (بيشرح لنا مهمة كل واحد في المنطقة)

هادي مكينة القص الكهربائية

العالم دي المختصين في قص السديري و الدقله وكدة!! حقون الافراح يعني لول

بعد القص يجي مرحلة البطانه حقت الياقات و الأكمام

ملاحظ كل موظفي المصنع لبسهم واحد كنموذج لي (one team)

بعد القص و القيطان يتم جمع الطلب في مكان واحد مع نوعية التوب و زي كدة

وتنتقل لغرفة الاوبريشن إللي بدورهم يسلموا ال (order) لمشرف الخياطين

والأن تيجي مرحلة الخياطة

ملاحظ إنه هناك عجلة الإنتاجية و كم ثوب تم تفصيلة في اليوم أو حتى اللحظة إللي أتخاذت فيها الصورة

وبعد كدة يجي دور الكواليتي الثاني

هنا يتم فحص خياطة الثوب قبل ما يحطوا الأزارير

وضع الزراير

هنا توضع الأزارير حق كل الأثياب

منظر تاني للأزارير

الكواليتي النهائي

هنا المفتش لازم يكون محترف ومعلم خياطه

هناك شفافية رائعه في المصنع - بعض الأخطاء إللي جات من عملاء

مرحلة التوزيع

هنا توضع الأثياب في كراتين خاصه و يتم توزيعها

وبعد كدة طلعنا للدور الخاص للشؤون الإدارية و المالية

بس إللي ملفت للإنتباه هادي الصورة!

هناك في حلاق!! يعني تزبط المزابيط قبل ما تدخل العمل لوول

كمان السيد لؤي يقول لو في أحد سعودي وعنده الإحترافية

ممكن يشغله هناك عندهم

=====

المثير للإنتباه وإنننوا الموضوع فله و عجبني جدا جدا

مكتب السيد لؤي

في الجدار حق مكتبه .. كل شهر من السنه بيكتب النتائج المحققه و كدة

فظيع!! شوفوا التعليق

روعه!

وكمان عجبتني إنه حاطط هدية جاته من موظفي الشركة! روعه

شموع على شكل مكينة خياطة!!

وبعدين جلسنا مع السيد لؤي للرد على أي استفسارات

ترا كل إللي بالصورة في تويتر بما فيهم السيد لؤي لووول

ومن الصحة إنه مافي بيبسي وما بيبسي

هادي اللوحه كل واحد يكتب مدى إعجابة بلومار

ودا كان تعليقي :))))))))

لحد يتريق على الخط بليز

وفي نهاية اليوم أخدنا هادي الصورة الجماعية مع السيد لؤي

يا زين العوامده (الحضارم سيماهم في وجوههم) لول

الحمدلله وإنتهت الزيارة

بالفعل لومار ... أبدع في هذه الكلمة

وهذا فيديو من المبدع رامي ريان جامع فيه الصور إللي صورها هوا

مصنع لومار .. دليل على إنه لا يوجد مستحيل ولا حياة مع اليأس.. أعتقد والله أعلم إنه لومار جاهز في الفترة القادمة للدخول إلى العالمية .. وإن شاء الله قادر .. السيد لؤي نسيم و عائلته, لديهم اللمسة السحرية إللي تخليهم مبدعين سعوديين في المجال دا! شخصيا انا تشرفت بمقابلة السيد لؤي نسيم و المصنع حق لومار يعتبر رمز من رموز المواطن السعودي الشاب الطموح و إللي يقدر يبدع في مجالات عدة .. النية و الإيمان و المبادرة هي أسباب النجاح


حابب أخص بالشكر لمجموعة الشباب إللي أجتمعنا معهم (ديوانية الشباب) وإللي كان لهم دور في لقائي مع السيد لؤي. أنس عامودي له الفضل الكبير في دعوتي لهذا الموضوع و جزاه الله خير كل الجزاء .. وأتمنى إني أشوفه صاحب مشروع ناجح مثل السيد لؤي... معصوب مثلا لووول. وكالعادة رامي ريان تلاقيه دائما في كل المواقف الجميلة والرائعه معاك على الخط .. وإن دل على معدن الأخ رامي الأصيل.


نهاية.. حابب أوصل رسالة قالنا هيا السيد لؤي لكل المواطنين السعوديين الطموحيين.. خريجي الجماعات وقاعدين يدوروا على وظائف. المجال مفتوح لهم في لومار و ترا رواتبهم طيبه جدا جدا. كمااااااااااااااااان الثوب إللي بتفصله لك عرض فيه :).

إجتمع العقل مع الإبداع... فأنتج لومار 

تابعوني في تويتر لمزيد من التقارير و الأخبار

@aido4ever

:)

وكدة



الشمس تستغيث

الشمس تستغيث (ياباغي الأجر أقبل)

الفكرة

حياتنا مليانه هموم ومشاكل وفوق كدة بنروح وبنشتري و بنتمشى عادي زي أي أحد عايش في مدينة جدة...نحن غافلون عن أناس قد يكونوا أخواننا أو جيراننا أو من نفس منطقتنا محتاجين لقمة نظيفة وحياة كريمة وأقل إحتياجات الحياة الطبيعية من أكل أو شرب أو دواء. شخصيا ما كنت متحمس إني أخوض التجربة لكن لسبب ما أو آخر قلت "يلا خلينا نروح ونشوف"...

الأهداف

تقدر تقول ثلاثة أهداف ..الأول ... كسب الأجر كما هو موضح في الأية القرأنية (خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِم بِهَا) "التوبة: 103" .. الثاني... مساعدة ناس محتاجة عن طريق زيارتهم وتقديم ما تجود به النفس من معونه... والثالث(جدا مهم).. كسر كبريائنا و معايشة الواقع ونقول الحمدلله على النعم إللي معطيها ربنا لنا.

كلمة حق

ماني عارف أقول منهم لله إللي ودوني هناك .. ولا أقولهم ألف شكر ... ولا أقولهم ما قصرتوا ... لكن في الأخير جزاكم الله خير على إللي عملتوه معايا.. ومن جد غيرتوا نظرتي للحياة ... وهدفي لأن إني أوصل إبني و زوجتي لبيت الحاجة شمس عشان يتعظوا ويشوفوا الحياة من نظرة آخرى. ألف شكر لكم يا شباب

إيش حكاية الشمس؟

شمس إسم السيدة ... أو بالأصح الحاجة شمس .. إنسانه عمرها يتجاوز المائة سنة وعندها إبن واحد في الثلاثينات من العمر... مشكلتهم بكل بساطة .. الحاجة شمس إنسانه مليانه في الحجم وعندها كل أمراض الدنيا المسكينه ... وإللي زاد الطينه بلًه, إبنها عنده خلل في دماغة المسكين (مختل عقلياً). ومقطعوين من شجرة وعايشين على صدقات و أكل الجيران.

لاحول ولا قوة إلا بالله ...طيب كيف حياتهم؟

هنا المعاناة كلها ... والألم الشديد إللي يهز جبال... حابب أنوه ممكن تكون الصور لها تأثير جامد على الكثير .. فما بالك لو زرتهم بنفسك ومعاك أسرتك أو اصحابك وشفتهم ... صدقني ممكن حيجيك نفس الإحساس إللي انا عايشه الأن. حابب أوصفلكم الصورة كاملة عن المنزل وأعذروني لو نقصت في شئ... المنزل عبارة  عن ...!!!! والله ما أدري إيش أقول .. خلي الصورة تتكلم أحسن مني وأحسن من اللوك لوك إللي  ماله داعي

المدخل حق البيت

 (وهوا عبارة عن 3*3 متر)

في وسط البيت خزان الموية!! ده خزان الموية

الثلاجة إللي أكاد أجزم نادر ما تلاقي فيها حاجه

هادي أرضية المدخل!! واضح لا بلاط ولا أي شئ

الدرجه إللي يودي على الملحق .. ما قدرت أطلع فيها

(ملاحظ إنه الباب متقفل بخشبة!!) من جد والله

حابب أوضح هنا إنه كل ما رأيتوه عبارة عن مدخل بدون سقف!!! قسم بالله مافي أي سقف يعني الحياة صعبه

إيوه وكيف غرف النوم و المرافق؟

حاجة تانية وألم ثاني غرف النوم.... هيا عبارة عن غرفتين نوم بالزبط .. حابب أنوه نظرا إنه السيدة كانت موجوده في غرفتها فما قدرنا نصورها لكن نقدر نوصف لكم الحالة عموما فيها.. بالنسبة لغرفة الإبن

نعم هادي غرفة النوم حقت الإبن وواضح إنه عايشين على المعونات من الرز و إنه الموية دائما مقطوعه و إنه بيعبوا الخزان من البراميل هاذي .. والسرير!! ترا في سرير .. فين ينام البني أدم ما أدري والله

منظر السقف (خشبي متهالك)

سقف غرفة النوم (والله ما أعرف كيف الناس هادي تعيش في الحر)

سألتكم بالله (هل شغالتكم او سواقينكم عايشين في غرفة زي كدة؟) من جد حرام

نتكلم عن المطبخ

مساحته (2*3) متر فقط

المطبخ يفتقر للأجواء لأي مطبخ طبيعي

دا بوتجاز (لكن مش شغال) من جد ماهو شغال!!!

القدور و الصواني

حابب أنوه إنه مافي أحد دخل هذا المطبخ من تقريبا 4 سنوات لعجز الحاجة شمس للوقوف

وخوفها على إبنها من النار!!!

طيب الحمام

الحمام عبارة مساحة متر ونص في مترين (جددددددا ضيق)

الرجاء ملاحظة مافي باب للحمام !!!

هنا الناس بتقضي حاجتها وفي نفس المكان تستحمى!!

غسالة في وسط الحمام

هذا الباب المؤدي لغرفة نوم الحاجة شمس

يا لطيف.. مافي أحد يساعدها من الجيران مثلا؟

ياعمي أقولك المنطقة كلها مساكين هذا بس مثال .. أكيد بيساعدوا بعض ... دي الناس إللي تعرف معنى (الناس لبعضها) يعني لقمة يتوازعوها مع بعض وكدة. حابب أرويكم المنطقة بره المنزل بالزبط ..

 

إللي يقرف لا يشوف الصور الجاية

عند مدخل البيت لقيت هذا الفار الميت!!! معليش بس نفسي أوريكم الصورة كاملة وكيف هاذي العائلة عايشة

((لا تعليق))

خلاااااااااااص أم التحطيم ... طيب و كيف وضع العائلة نفسها؟

هادي لما جلسنا مع إللي دلنا عليها (إسمه عبدالرحمن) أتكلم معانا وإليكم متطلبات العائلة هادي:

• الحاجة شمس لم تتحدث مع أحد نهائيا في ال 3 سنوات إللي فاتت!!!!!؟
• نفسها تزور الحرم المكي وتشوف الكعبة (بس ما تقدر بحكم الحجم والمرض ومين حيوديها طالما مافي فلوس توصلها وكدة)
• نفسها أحد يوفر لها الدواء بحكم إنه غالي (حابب أذكر إنه عمرها فوق المية سنة)
• بس!!! والله هادي الحاجات إللي قالوها لنا

طيب البيت و الوضع إللي هما فيه... الحاجة شمس رافضه تماما تنقل من البيت ... يعني مافي أمل تخرج منه.

طيب يعني إنت تبغانا نتبرع لها وزي كدة؟

لا .. انا أتمنى من الكل يزور المكان .. ويشوف بنفسه الوضع كاملا وبعدين يساعدها بإللي يقدر عليه .. يعني نتمنى من رب العالمين إننوا أحد يقدر يساعدها ويأمن لها عيشة كريمة و فرشة نظيفة تنام عليها و كدة ... بموجب إللي شفناه مبدئيا.. العائلة تحتاج التالي:

• مقاول لترميم البيت
• شركة تنظيف
• الدواء اللازم
• الفرش الأساسي البسيط

يعني بعد كل إللي شفتوه ... عيب نقول العائلة هادي عايشة كيف ...

طيب جزاك الله خير.. وكيف الواحد يقدر يوصل لبيتهم؟

طيب البيت ما يبعد عن شارع التحلية بي 10 كيلوا متر.. هوا المكان في كيلو 2 أو السبيل .. لكن أحسن طريقة عشان للتنسيق لمقابلة العائلة هادي هي الإتصال بالسيد عبدالرحمن جمال الكندي (0561915555) وتتفقوا معاه على مكان قريب وهوا يوصلكم. انا أقولكم إيش في مكان قريب من بيتها من معالم جدة:

• برج الموية
• حديقة خزام
• كلية عفت
• سوق الخيمة

في هادي المناطق البيت ... معليش والله ماني قادر أجيبه بالتحديد لكن أضغط على الرابط http://4sq.com/vfawFr

طيب عندك حاجة تانية؟

والله شوف يا حبيبنا ... انا من يوم ما زرت الحاجة شمس وبدأت أتحمد الله على العيشة إللي إحنا عايشينها .. بدأت أحس إنه في ناس كثير محتاجه الأكل و العيشه الهنية والأمان البسيط حتى. أتمنى فعليا الناس تأخد أهلها ويروحوا يزوروا الحاجة شمس وصدقني حتلاقي ردة فعل غريبة ... كثير حيقولوا إنه في ناس بالهبل عايشين أخس من كدة ... أرد عليهم .. إللي يقول شي وإللي يفعل شي ثاني .. روح وزورهم .. شوف إيش محتاجين .. ساعدهم .. كون إنك تسمع معناها إنت ما عشت أو جربت الحياة الثانية.

والله أعلم إنه أقل من 10 كيلوا من شارع التحلية بيتها .. يعني قريب جدا .. من جد إنجاز رائع لو بدأت أول خطوة زي ما عملنا إحنا .. أتصل بالسيد عبدالرحمن وهوا حينسق معاك على موعد يناسبك إنت .. خد زوجتك وأولادك ..

كل إللي أطلبه من أي قارئ منكم الدعاء للمجموعه إللي جزاه الله خير أرشدتني للحاجة شمس وإللي صدقا من جد غيرت مفاهيم كثيرة في حياتي.. جزاكم الله خير (ترا انا واحد منهم- يعني لا تنسونا من الدعاء بالله)

أخيراً... لحد يعدد الأسباب .. إحنا رجال وحقون أفعال .. انا ما قلت نغير الكون أو حي ... لو نجح موضوع الحاجة شمس ... إن شاء الله حأكون يد العون إني اطرح تقارير أخرى عن عوائل أخرى كمان ... وليش ما تعملوا زي كمان .. وكلنا يد وحدة في مساعدة المحتاجين ...

أسف على التطويل .. ومن جد من أكثر التقارير إللي خايف إني نسيت حاجة ما كتبتها ... فلو نسيت شي سامحوني .. وأنا موجود في حالة أي إستسفسارات أكثر... والله ولي التوفيق

Please Follow me on Twitter

@aido4ever

يعطيكم العافية