شارع التحلية - جدة
حقائق شخصية
شارع التحلية لمدينة جدة يعتبر أكثر المناطق الحيوية من حيث وفرة المطاعم والمولات و المحلات ذات تصنيف "بوتيك"
راي شخصي
شارع التحلية ممكن لو قدر يتكلم و يسرد قصص - كان ألف كتاب تحت إسم "عجائب الدنيا المليون" .. في موضوعي لن أتطرق لكل الأحداث, إنما سوف أتحدث عن حقبة من الزمن عشتها في ذلك الشارع وبالتحديد في نهاية الثمانينات و بداية التسعينات.
إيش شارع التحلية؟
التحلية يا سيدي هوا شارع يمتد من ميدان البراميل من الغرب .. حتى طريق مكة السريع من الشرق ... يعني واخد جدة بالعرض
وليش في التسعينات؟
في شارع التحلية كان الوضع عادي إنك تشوف مجموعه من الشباب موقفين سياراتهم في أحد أركان الشارع باساعة أو الساعتين و لوك لوك لوك !! ممكن بسبب ما كان موجود كافيهات زي الوضع الحالي .. فكان المتنزه الوحيد إنك تجنب السيارة و تتم التجمعات الحلوة وإللي منها يتم التخطيط على فين نتعشى أو فين نكمل سهرتنا لليوم... تلك الفترة كانت العصر الذهبي للشباب " المورقيين" وما كان فيه في عهدنا موبايلات تشغلنا و تخلينا نبتعد عن الناس... والسهر فيها كان بدون مضايقات.. فين رحت وفين جيت
ماهي أشهر الأماكن في شارع التحلية في ذلك الوقت؟
حأحاول أذكر أغلبها .. لو نسيت حاجه فكروني يا قدامى التحلية:
- هارديز: فتح مرتين .. وفي مكانين مختلفين .. وكلها تعتبر مركز لتجمع الشباب (ورقص الفنكي) ههه أفتكر كدة
- سبارو: محل إيطالي .. فتح محل هارديز القديم لم يدم طويلا وقفل بسبب .. مقاطعات وما أدري إيش!!
- شيخ البيتزا: يا كان عليه سندويتش سبمرين .. لهههههب
- باكوس تاكوس: أول مطعم مكسيكي في جدة (جنب هارديز القديم)
- سبورت ستوديو: فتح مكان باكوس تاكوس و شيخ البيتزا .. عمل زوبعه في عالم الكورة و كان كل الناس تحب تروح تشوف مباريات .. بالتحديد قسم العوايل
- رنديفوا: فتح بعد سبورت ستوديوا! .. كان مكان للعيال ( ....) صح ولا غلط .. ما كنت أروحله أساسا
- بيغ ماك: حاول ينافس هارديز بحكم قربه .. لكن هيهات .. مافي مجال .. على الرغم إنه الصوص كان طيب مع البرجر
- كودو: فتح محل بيغ ماك و لقى صدى عالي .. و كان موقف للفطور و رخيص مقارنه بالمحلات إللي جنبه
- الثمرات: الفول .. و التميس و الأكل البلدي ..... قفل بسبب سمعة كانت إنه في صراصير .. وكمان سعر الفول المبااااااااااااالغ
- بلاد الالعاب: كان قبل مركز بقسماطي .. الله أعلم كل واحد من اطفال جدة في ذاك الزمان إلا يكون عنده أقل لعبه أو إثنين من هنا!!
- بارنيز: غير مفهوم التجمع الشبابي في جدة .. صار أنضف و أكشخ
- بلو مارين: أول محل يبيع قمصان فريساتشي وإستانتي (كان القمصان تبدأ 1500 ريال!!) احا !!
- الخيول: كانوا الناس يقولوله ستاليون (لداعي الكشخه) محل الشرايط
- وينديز: أوووه على ذيك الأيام الخوالي ... كان عنده وجبة برجر 75 ريال .. وعادي كنا ندفع (أم الكاش)
- بيتزا هت: هههه تحفة من تحف ربنا خخخ يوم غذاء حتى الإشباع .. كل جدة هناك
- علوان: أقدم محل زهور .. ومن أجمل الهدايا الورود عنده ولا يزال
- هابي لاند: محل حق أعياد الميلاد وهدايا البزورة ... برضوا تابع لعلوان
- بوباي: أووووووووه على جمبري بترفلاي ... كان له هيمنه في مدينه جدة بدون منازع
- بن صديق: الله أعلم أكبر محل أقمشة حريمي .. وبحكم إنه كشخه .. بيسلخ الحريم بأسعار القماش .. الله أعلم
- مذركير(BHS): الحكير لن يترك المكان... المكان هذا زحححححححمه على مدار السنة ما أدري ليش (زمان كنا نقول إنه حاطط سحر على دعاسة المدخل)!! -___-
- قريطاسية ريما: مكتبة كانوا كل الشباب الكووول و البنات الكولات يقضوا حاجات المدرسة منها (مرسام أبو ريحه من هناك) .. وكتيب الذكريات أبو مفتاح وكدة
- البساتين: ممممم وأه و ممممممممم ما أدري (أروع و أجمل و أحلى و أرقى و أكووول و كل شي) سوق ... ولا يزال القمة (للمعلومية .. أول إعلان كان كامري أتصور هناك.. يعنني إنها سيارة وااو) هههه
- كريب البساتين: كريب جبنة سايحه أو كريب النوتيلا (لا يوجد له مثيل في العالم) .. داخل سوق البساتين
- الدولية: محل في البساتين ويعتبر أشهر محل عنده ألعاب إليكترونية زي نيو جيو .. و نين تيندو .. وغيرهم كان مغلواني بس مشهور
- دانوب البساتين: كان زمان وسط السوق .. كان مكان حق فطور وميني ماركت للناس الهاي كلاس يشتروا مقاضي البيت بمليون ريال مثلا!!! احا بس كان فيه موزز ههههه
- حلاق بلاتين في البساتين: كان تبدأ الحلاقة عنده 120 ريال !! والله كانوا يسلخوا جدنا ههههه...
- مجوهرات الثبيتي: من كثر ما كان غالي كنا ما ندخله ... من برا لبره هههه نادر أفتكر دخلته وشريت منه ههه الأن تغيرت الأحوال
- بيبر موون: محل تغليف الهدايا .. لو الأهل أذكياء .. وشافوا بناتهم جايبين هدايا .. فأعلم التغليف من هناك .. الفن مين غلفها لول .. من جد
- الديوان: مطعم البرجر القديم .. الأن مكانه بولغاري ... كان منافس حقيقي لهارديز و وينديز
- كافتيريا شهرزاد: كان مكان لتجمع شباب الطراحات المشهوريين و بالتحديد أصحاب الموستنغات وقتها .. حركات والله .. الأن محله (القرشي حق العودة)
- باسكن روبنز: أشهر مكان فتح في جدة للأيس كريم .. وفي الصباح أو بعد العشاء ممكن البنات يدخلوا .. ووووو ما نكمل هههه بس حلو حلو حلو هناك
- الغالاريا: أوووووه على المركز دا ... كان فيه بوليونكيلز و سوبرماركت جدة للتسويق والنادي الرياضي للناس الأغنياء وقتها و مطعم شنغريلا حق التدييت الراقي هههههه بس وكدة
- مناسبات: محل لتغليف الهدايا ... بس أقل مستوى و أرخص .. مو خدم بس إللي على قد حالهم ههههه صح كدة؟
- بيت أبو داوود: من أجمل البيوت في جدة وعمل هدية جميلة لجدة وإللي هي ساعة بيت أبو داوود إللي على الميدان (شي والله)
- كيدز أيلاند: محل البزورة و ملاهي الاطفال .. زمان يا فن .. من هنا ناس أتزوجت ههههههه من جد
- كمبيومي: فتح بعد كيدز أيلاند .. مختص للكمبيوتر وكان مغلواني بشكل مو طبيعي .. من جد
- قهوة التحلية .. محلها الأن "المنتز 2" كانت تقدم قهوة و شيشة جراك و الجلسة كانت كرويتات و كدة .. وقفلت بسبب مضاربه كبيرة مشهورة ذاك الزمان
- غرائب طرسام: أوووه كل الحاجات الممنوعه من أليكترونيات و حركات في بيوتنا تلاقيها هناك .. أنوار غريبه و إضائات و حركات ... رائع المكان دا كان
- بندروزا: الستيك وأول مكان عرفنا إننوا في مطاعم مخصصه للسيتك في العالم .. شكرا يا بيت فخري
- رتوة: معرض سيارات غير مفهوم الفخامة في جدة ... أرقى سيارات العالم تلقاها هنا للبيع وفي مركز الخياط!! أعرف عائلة (من جد ومو كذب) كانت شهريا طاققة سيارة ولمدة سنة من رتوة! احححا أم الكاش يا ناس (الدليل ... شووو....
من جد لو عصرت مخي كمان شوية كان جبت أكثر وأكثر ههه بس كدة كفاية ...
هناك أماكن لازم الواحد يتطرق لها لقربها من شارع التحلية وتعتبر معلم مهم جدا جدا .. السادة القراء طلبوا مني ذكرا .... يلا نبدأ:
- السيفواي: التاريخ .. الشهرة .. كانت المنطقة كلها في ذلك الوقت تتنادى بالسيفواي .. الخدم كانوا يقولوا عنه (السيييف - يووووي) .. سوبرماركت كل الناس الحلوة (من جد) يقضوا حاجات البيت منه و كان يجيب منتجات من أمريكا فيا هوووووو وقتها .. و كروت الأعياد و شششي .. في داخل السيفواي كان في محل يقدم قهوة أمريكي عجب .. كان هناك يجتمعوا مجموعه شباب مدارس النصر الأهليه فاكر
- بيت الدونات: المحل إللي عرف أهل جدة بالدونات .. تجمع كبار و عمداء شارع التحلية .. لمن لا يعلم .. هناك كانوا الشباب يجلسوا .. والبنات إللي كانوا يلفلفوا!!! شوفت الزمن كيف أتغير هههه بيت الدونات كان فيه دفتر حضور و إنصراف لكافة الشباب .. لو محد حضر في ذلك اليوم .. يتم السؤال عنه عن طريق تلفون الدونات .. وكدة .. من الصباح إلى أخر الليل المكان (فل فل) أه يا زمن الدونات
- الحلاب (الفطايرجي حاليا): كانت الشاورما هنا لها نكهة ..جنب بيت الدونات .. الاكل بضمير .. ويا عليه مفروكة و لا زناد الست .. ولا مبرومه ول ول ول ..
- صالون دار: ثاني حلاق ينصب علينا هههه بس كنا نحب نروحه .. ممتاز جدا .. الحلاقين كانوا أصحاب لنا .. ولا يزال موجود
- تسجيلات دندنه: محل شرايط .. أشهر مكان في جدة يبيع جلسات لكل الناس .. وشهرته وصلت لخارج مدينة جدة وحتى للخليج!! يرحم ذيك الأيام
- باعشن لألعاب الأطفال: محل مميز .. جنب دندنة .. كان عنده سيارات بريموت كنترول بي 2000 ريال!! ولا يخت بريموت (لعبة 4000 ريال) اححا .. لعبة .. المشكلة إنه كان يبيع!!
- خطوط الصحة: أكبر محل للملابس والادوات الرياضيه (حق العيسائي) كان جدا غالي مقارنة بي باناصر و غرناطة و مركز خالد ذاك الوقت هههه
- شاورما الرمال: كان ولا يزال إلى الأبد "أفضل شاورما و حلوم في العالم لدي" ويوافقني أغلب أصدقائي .. إلى اليوم لا يوجد له منافس ... نننعم
- القرموشي: في الغالريه!! لا يروح بالكم حق الفول ههه لا كان يبيع مطعم قرموشي بيتزا و برجر و كدة ... كانوا الحريم حقين النادي الصحي و إللي داخل سوبرماركت جدة للتسويق يتمشوا فيه. طيب بس مو زي البقيين ولذلك قفل بدري بدري
- مدارس دار التربية للبنات: بعيدة صح؟ هههههه بس ما أدري ليش كانت رجلنا تحسها جنب التحلية ... كان مريولهم طيب لووووول .. وكمان حفلة تخرجهم السنوية مرررررررة زحمة (لكن الواقع فاضيه) خخخخ كللوا بره بره أيام والله
- الثانوية العاشرة: الله أعلم ... ثلث جيلنا من الأخوات متخرجين منها!! العاشره لها مسميات كثر هههه مو لازم نذكرها .. وانا متأكد لو أي طالبه حبت تكتب مذكرات عن العاشرة .. حيلاقي مبيعات صاحبة وممكن يكون (BOOK OF THE YEAR) .. إسمها متلازم مع شارع التحلية منذ بداية الثمانينات .. مدرسة حكومية بس الطالبات إللي فيها (منقايين على الفرازه) مجتهدات وكدة لا يروح بالكم بعيد ... فين أم هاشم؟؟ ههههه
المقصد من المدونه!!
ذكريات الماضي الجميل .. وحابب أخلدها .. في زمن ما كان فيه لا بيجر ولا موبايل ولا حتى ابو كلب .. كنا عايشين على الأنسر مشين وكدة ... والله الأيام كانت حلوة و جدة كان لها رونق رائع ... ومن جد كلمة أقولها " من لم يعش في زمني .. ما عاش جمال جدة" .. جلست أدور في الإنترنت إنه أحد يعبر أو يكتب عن شارع التحلية في هذا الوقت.. مالقيت (-___-) .. فحبيت تكون ليا المبادرة في طرح الموضوع .. وأه على زمن كانوا أهل جدة يتغنوا في حبها ..
أحب جدة من كل قلبي وإلى الآن لها رونقها و وجمالها
وكدة
==============================================
تعليقاتكم من أجل التطوير تهمنا ... وسامحونا على التقصير
بس وكدة
Subscribe
Aido Advisor
our facbookgroup click below
Please Follow me on Twitter
@aido4ever
:)
=============================================
لمتابعة تقارير مطاعم جدة زورونا على مدونه
لمتابعتنا على تقارير السفر و السياحة الآخرى زورنا على مدونة
